Esta mañá tivemos que acordar un pouco antes do habitual para comezar unha viaxe ás 7:00 dende Castroverde (Lugo) ata a costa da Ría de Ares para facer un roteiro compartido con asociacións amigas como Amigos do Patrimonio de Castroverde, Arumes do Corgo (Lugo), Canteira de Neda, e Agrupación Instrutiva de Redes e Camouco (A Coruña), sendo esta última a nosa anfitriona no XVI encontros de Asociacións.
O punto de encontro foi en Cabanas, xunto á caseta de turismo onde se atopan algúns membros da Agrupación de Camouco para darnos a benvida e guiarnos no percorrido ata Ares.
Comezamos a andaina na praia da Madalena que está no concello de Cabanas e continuamos por sendeiros preto da estrada acompañados sempre por dous coches de Protección Civil xa que eramos un grupo grande.
Chegamos a unha zona pola que discorre o río Castro no que houbo muíños noutro tempo e seguindo por sendeiros con pendente profunda na veira do mar puidemos chegar ata a súa desembocadura onde se atopan as ruínas dun muíño de maré, que funcionaba coa maréa cando o río levaba moita auga.
Pasamos polas praias de Coido, Río Sandeo , Río Castro, cala Chamoso, praia de Redes...cunhas vistas espectaculares e todas elas situadas nos concellos de Cabanas, Fene e Ares.
Cando só nos faltaban uns tres quilómetros para chegar a Ares, onde xantaríamos, fixemos unha parada en Redes nun edificio de estilo indiano que foi escola nos tempos da emigración a Cuba feita polos emigrantes deste lugar para que a educación chegase a todos e todas e formase cidadáns que logo poderían aceder a mellores empregos se optaban por seguir o camiño da emigración. Era unha escola mixta aínda que nenas e nenos estiveran separados.
Co paso do tempo, o edificio caeu en desleixo pero foi recuperado nos tempos actuais como centro social multiusos onde se imparten distintos obradoiros adaptados a todas as idades que dirixe a Agrupación Instrutiva de Caamouco.
Alí explicáronnos o seu proxecto e as funcións desta fermosa casa construída ao estilo indiano e que destaca polas súas dimensións, con xardín e casa de baño para nenos e nenas no que sería o patio de recreo.
Non faltaron uns deliciosos petiscos e refrescos que acougaron as ganas de comer despois dunha boa camiñada.
Dende alí emprendemos ruta a Ares atravesando a longa praia de area fina e ondas mainiñas que bicaban os nosos pes cando o sol se adonara do ceo e deixara atras a bretemosa e mesmo fría maña deste 30 de maio.
Chegamos a Ares sobre as 14:00 e dirixímonos de contadiño ao restaurante no que íamos xantar alomenos 116 comensais. No escenario tiñamos a un cantante e guitarrista, Geno Fernández que nos deleitóu con temas galegos coñecidos por todos.
O xantar consistíu en polbo con patacas cocidas e codillo con patacas fritas, bebidas variadas, tarta xeada de sobremesa, café e chupitos e logo a Rondalla do Concello de Ares, fíxonos bailar ao son de habaneiras, valses e outras.
Intercambio de agasallos entre asociacións e de volta no autobús a Lugo, O Corgo e por último Castroverde.
Foi un gran día de convivencia entre xentes de diferentes sitios, unhos da costa e outros do interior que o celebramos como un irmanamento e co entusiasmo de seguir nestes grupos que xa van escaseando.
Deixo fotos comentadas.
Chegada a Cabanas
Camiñando pola praia da Madalena
Igrexa de San Martín do Porto 1788
Foto de grupo na praia da Madalena
Foto de grupo na desembocadura do Río Castro.
Entrando en Redes.
O director da Agrupación Instrutiva de Redes e Camouco
Refrixerio no Centro Agrupación Instrutiva de Redes e Camouco.
Un calexón de Redes.
Ningún comentario:
Publicar un comentario
Grazas por comentar, por empatizar e por vir en son de paz.